काठमाडौं। मन्त्रिपरिषद् विस्तारपछि नवनियुक्त मन्त्रीहरू सुधन गुरुङ र महावीर पुन शपथग्रहणका लागि राष्ट्रपति भवन शीतल निवास पुगेका छन्। प्रधानमन्त्री बालेन शाहको सिफारिसमा दुवै जनालाई मन्त्रिपरिषद्मा समावेश गरिएको हो। स्रोतका अनुसार शपथग्रहण कार्यक्रमपछि दुवै मन्त्रीले तत्काल आफ्नो कार्यभार सम्हाल्ने तयारी गरेका छन्। सुधन गुरुङलाई गृह मन्त्रालयको जिम्मेवारी दिइएको छ भने महावीर पुनले नवप्रवर्तन मन्त्रालयको नेतृत्व गर्नेछन्।
गृह मन्त्रालयको नेतृत्वमा पुनरागमन गरेका गुरुङ यसअघि पनि छोटो अवधिका लागि गृहमन्त्री बनेका थिए। त्यतिबेला सम्पत्ति स्रोतसम्बन्धी विषयमा प्रश्न उठेपछि उनको भूमिकामाथि छानबिन भएको थियो। अहिले पुनः सरकारमा फर्किएसँगै सुरक्षा प्रशासन र शान्ति–सुरक्षाका विषयमा उनको कार्यशैलीलाई चासोका साथ हेरिएको छ। यता, प्रविधि र अनुसन्धान क्षेत्रसँग जोडिएका महावीर पुनलाई नवप्रवर्तन मन्त्रालयको जिम्मेवारी दिइनुलाई सरकारले अनुसन्धान, प्रविधि विकास र उद्यमशीलतालाई प्राथमिकता दिन खोजेको संकेतका रूपमा हेरिएको छ।
नवनियुक्त मन्त्रीहरूको शपथसँगै प्रधानमन्त्री शाह नेतृत्वको मन्त्रिपरिषद्ले पूर्णता पाउने अपेक्षा गरिएको छ। राजनीतिक वृत्तमा भने नयाँ मन्त्रीहरूले आफ्नो जिम्मेवारी कसरी अघि बढाउँछन् भन्ने विषय चर्चा र चासोको केन्द्र बनेको छ।
