काठमाडौं— विवेकशील साझाका नेता मिलन पाण्डे राष्ट्रिय स्वतन्त्र पार्टीको एकीकरणमा सहभागी नहुने भएका छन्।
विवेकशील नेपाली दलको अध्यक्ष भएका उनले आइतबार हुने एकीकरणमा सहभागी नहुने सामाजिक सञ्जालबाट सार्वजनिक गरेका हुन्। साझा पार्टी अधिकांश नेता निःसर्त एकतामा सहमत भएका छन्।
विवेकशीलबाट रन्जु दर्शनासहित एकतामा उत्साहित हुँदा मिलन भने एकता प्रक्रियाबाट बाहिरिएका हुन्। उनले अब केही समय (केही दिन वा केही महिना) ‘कुलिङ पिरियड’ लिने र त्यसपछि नयाँ तरिकाले राजनीतिक यात्रा सुरु गर्ने लेखेका छन्। उनले भावी राजनीतिक यात्राबारे खुलाएका छैनन्।
अब आफू र विवेकशील पनि स्वतन्त्र भएको लेख्दै पुनः विवेकशील अभियान ब्युँताउने संकेत भने गरेका छन्। पहिलो पटक उज्जवल थापाको नेतृत्वमा विवेकशील र साझा एक भए पनि केही समयमै थापा समूह अलग भएको थियो।
निर्वाचनबाट पाण्डे अध्यक्षमा निर्वाचित भएपछि पुनः एकता अभियान अगाडि बढ्यो। आन्तरिक मतमा एकताको पक्षमा बहुमत पुगेपछि मिलनसहितका नेता साझामा गए पनि उज्जवल समूह भने अलग बसेको थियो। कोरोनाकालमा उज्जवलको मृत्यु भएको थियो। त्यसपछि विवेकशील अभियान छिन्नभिन्न भएको छ।
