धनकुटा— भदौ २३ र २४ गतेको जेन जी आन्दोलनका क्रममा सुनसरीको झुम्का कारागारबाट फरार भएका पाँच कैदी धनकुटामा पक्राउ परेका छन्। फरार समूहमा अदालतले अढाइ वर्षदेखि २५ वर्षसम्मका कैद सजाय सुनाएका कर्तव्यज्यान, अंगभंग र लागूऔषधसम्बन्धी मुद्दाका दोषी समावेश छन्।
सबैभन्दा कडा सजाय भोगिरहेका धरान-२० का ३२ वर्षीय सागर राईलाई प्रहरीको टोलीले छथर जोरपाटी गाउँपालिका–२, आलेगाउँबाट पक्राउ गरेको हो। उनी कर्तव्यज्यान मुद्दामा २५ वर्षका लागि सजाय पाएका थिए।
धनकुटाकै चौबिसे–२ धारापानीका रमेश माङमी मगरलाई घरमै लुकेर बसेको अवस्थामा पक्राउ गरिएको धनकुटाका एसपी शरतकुमार थापा क्षेत्रीले जानकारी दिए। उनी कर्तव्यज्यान, जबरजस्ती करणी र चोरी मुद्दामा २० वर्ष कैद र १ लाख रुपैयाँ जरिवाना भोगिरहेका थिए।
त्यसैगरी, कर्तव्यज्यान मुद्दामा १२ वर्ष ६ महिना कैद पाउने संखुवासभाको खाँदबारी–९ का युवराज राई साँगुरीगढी–६ भेडेटारबाट पक्राउ परेका छन्।
अंगभंग मुद्दामा २ वर्ष ६ महिना कैद र २५ हजार जरिवाना काटिरहेका चौबिसे–३ का सिजन तामाङ पनि समातिएका छन्।
लागूऔषध मुद्दामा पुर्पक्ष थुनामा रहेका धनकुटा सहिदभूमि–२ का २१ वर्षीय गन्धरे भनिने सुरेश शिवा भने आफ्नै घरबाट पक्राउ परेका हुन्।
पक्राउ परेका पाँचै जनालाई पुनः कारागारमा पुनस्थापना गरिएकोे धनकुटाका एसपी थापा क्षेत्रीले बताए।
