काठमाडौं— चाडपर्वको यात्रा सुरक्षित बनाउन भौतिक पूर्वाधार तथा यातायात मन्त्री कुलमान घिसिङले चालक र यात्रु दुवैलाई विभिन्न सुझाव दिएका छन्।
दसैँका लागि यात्रुहरू काठमाडौंलगायत सहरबाट आफ्ना घर फर्कने यात्रुहरूको चाप बढिरहेका बेला मन्त्री घिसिङले बुधबार बिहान सामाजिक सञ्जालमार्फत चालकलाई चार र यात्रुलाई चार सुझाव दिएका हुन्।
उनले लेखेका छन्ः सम्पूर्ण चालक तथा यात्रुहरूमा विशेष अनुरोधः
तपाईंको जीवन र तपाईंको परिवार राष्ट्रको अमूल्य सम्पत्ति हो। त्यसैले यो पर्वमा घर फर्किँदा वा यात्रा गर्दा रमाइलो त पक्का गर्नुहोस्, तर हतार नगरी, सजग भई, नियम पालना गरेर यात्रा गर्नुहोस्।
चालक साथीहरूलाई अनुरोधः
-गति नियन्त्रणमा राख्नुहोस्।
-मदिरा सेवनपश्चात् कुनै हालतमा सवारी नचलाउनुहोस्।
-विश्राम लिएर मात्र लामो यात्रामा निस्कनुहोस्।
-यात्रुलाई आफ्नो परिवारझैँ सम्झेर सुरक्षित गन्तव्यसम्म पुर्याउनुहोस्।
यात्रु दाजुभाइ तथा दिदीबहिनीहरूलाई अनुरोध:
-क्षमताभन्दा बढी सवारीमा चढेर आफ्नो जीवनलाई जोखिममा नपारौँ।
-चालकलाई दबाब नदिई शान्त र सुरक्षित यात्रा गर्न प्रोत्साहन गरौँ।
-यात्राको क्रममा आवश्यक सुरक्षा र सावधानी अपनाऔँ।
-यस दसैँमा हाम्रो उद्देश्य केवल गन्तव्यमा पुग्नु मात्र होइन, सुरक्षित र खुसीसाथ पुग्नु पनि हो।
सडक सुरक्षा नै जीवन सुरक्षा हो, जीवन सुरक्षा नै परिवारको खुसी हो र परिवारको खुसी नै हाम्रो राष्ट्रको शक्ति हो।
यहाँहरू सम्पूर्णलाई दसैँको हार्दिक शुभकामना!
यातायातका साथै सहरी विकास र ऊर्जा, जलस्रोत तथा सिँचाइ मन्त्रालय पनि घिसिङले नै सम्हालिरहेका छन्।
