सिरहा— सिरहाको लहानमा भारतबाट ल्याइएको अवैध कपडा बरामद गरिएको छ। सशस्त्र प्रहरी बल नेपालले भारतीय नम्बर प्लेटको स्करपियो गाडीमा लुकाइएका कपडासहित गाडी नियन्त्रणमा लिएको हो।
लहान नगरपालिका–१९ छारापट्टी चोकमा सशस्त्र प्रहरी सुरक्षा बेसको मोबाइल टोलीले चेकजाँचका क्रममा ती सामान फेला पारेको हो। टोलीको नेतृत्व सशस्त्र प्रहरी नायब उपरीक्षक विजयकुमार चौधरीले गरेका थिए।
ठाडी–लहान भित्री सडकखण्डमा चेकजाँच भइरहेका बेला बिआर ०१ पिबी ४६४२ नम्बरको सेतो स्करपियो जाँच नगरी तीव्र गतिमा फरार भएको थियो। त्यसपछि सशस्त्र प्रहरीले गाडीको पिछा गर्दा लहान नगरपालिका–१९ कटाहा चोकमा गाडी बेवारिस अवस्थामा भेटिएको हो।
सशस्त्रका अनुसार गाडीका चालक फरार छन्। बरामद स्करपियोको अनुमानित मूल्य १५ लाख रुपैयाँ रहेको छ भने त्यसमा राखिएका विभिन्न प्रकारका कपडाको मूल्य ७ लाख ४ हजार ८५० रुपैयाँ बराबरको रहेको छ।
बरामद गरिएको गाडी र सामानहरू भन्सार कार्यालयमा बुझाइएको सशस्त्र प्रहरीले जानकारी दिएको छ। घटनाबारे थप अनुसन्धान भइरहेको जनाइएको छ।
