काठमाडौं – अख्तियार दुरुपयोग अनुसन्धान आयोगले घुस प्रकरणमा संलग्न दुई पूर्व मन्त्रीका मोबाइल फोन नियन्त्रणमा लिएको छ। पछिल्लो समय उच्च पदस्थ व्यक्तिहरूमाथि कडा निगरानी गर्दै आएको अख्तियारले पूर्व सामान्य प्रशासन मन्त्री राजकुमार गुप्ता र पूर्व भूमि, व्यवस्था तथा सहकारी निवारणमन्त्री रञ्जिता श्रेष्ठका मोबाइल नियन्त्रणमा लिएको हो।
गुप्तामाथि कास्कीको मालपोत कार्यालय प्रमुखको सरुवाका लागि ५३ लाख रुपैयाँ र भूमि आयोग कास्कीका अध्यक्ष नियुक्तिका लागि १० लाख रुपैयाँ घुस लिएको आरोप छ। कुल ७८ लाख रुपैयाँको "डिल" भएको आशंकामा अख्तियारले उनलाई बयानका लागि बोलाएको हो। अनुसन्धानका क्रममा गुप्ताको मोबाइल फरेन्सिक परीक्षणका लागि लिइएको जनाइएको छ।
यस्तै, रञ्जिता श्रेष्ठसँग पनि अख्तियारले विस्तृत बयान लिएको छ र उनको मोबाइल पनि नियन्त्रणमा लिइएको छ।
यसैबीच, पोखराका सुकुम्बासीसम्बन्धी अडियो सार्वजनिक भएपछि घटनामा जोडिएका पीडित सुजन लामाले आफूलाई मिडियाले बिचौलिया बनाएको आरोप लगाउँदै, मन्त्रीहरूले आफूको मोबाइल कब्जामा लिएको बयान दिएका छन्। सुजनले अख्तियारमा विगत चार दिनदेखि निरन्तर बयान दिँदै आएका छन्।
