काठमाडौं— हवाई ट्राफिक नियन्त्रण कक्षसँग सम्पर्क विच्छेद भएपछि एक रुसी यात्रुवाहक विमान बेपत्ता भएको छ। रोयटर्सका अनुसार विमान रुसको पूर्वी अमुर क्षेत्रमा उडिरहेको थियो। यो एएन-२४ विमानमा लगभग ५० यात्रु सवार थिए। यस क्षेत्रका गभर्नरले विमानको खोजी भइरहेको बताए।
स्थानीय आपतकालीन मन्त्रालयले विमान चिनियाँ सीमा नजिकै रहेको ब्लागोभेस्चेन्स्कको खाबारोभस्क हुँदै टिन्डा जाँदै गरेको बताएको छ। टिन्डा पुग्नुअघि नै यो राडारबाट हराएको थियो र सम्पर्क विच्छेद भएको थियो।
अमुरका गभर्नर भासिली ओर्लोभले हराएको विमान अंगारा एयरलाइन्सको भएको बताए। यसमा ४३ यात्रु र ६ जना चालक दलका सदस्य थिए। यात्रुहरूमा ५ बालबालिका पनि थिए। उनले भने, 'विमान खोज्न सबै आवश्यक स्रोतसाधन र टोलीहरू खटाइएको छ।'
इन्टरफ्याक्सको रिपोर्ट अनुसार विमान टिन्डा विमानस्थलमा अवतरण गर्ने पहिलो प्रयासमा असफल भएको थियो। दोस्रो पटक अवतरण गर्ने प्रयास गर्दा यो राडारबाट गायब भएको हो।
टास समाचार एजेन्सीले एक स्रोतलाई उद्धृत गर्दै भनेको छ, 'विमानले टिन्डा विमानस्थलबाट केही किलोमिटर टाढा तोकिएको चेकपोइन्टसँग सम्पर्क गर्न पनि असफल भयो।'
टिन्डा शहर रुसी राजधानी मस्कोबाट लगभग ६,६०० किलोमिटर पूर्वमा अवस्थित छ।
गत वर्ष पनि अमुरमा हवाई दुर्घटना भएको थियो। त्यसपछि ३ जना सवार रोबिन्सन आर६६ हेलिकप्टर उडानको क्रममा बेपत्ता भयो। यो हेलिकप्टरलाई उडान गर्न अनुमति दिइएको थिएन।
आपतकालीन संकेत पाएको एक दिनपछि टोही टोलीहरूले बिहान जोलोटोया गोरा नजिकै यसलाई फेला पारे। यसमा एक पाइलटसहित तीनै जनाको मृत्यु भएको थियो।
