काठमाडौं — नेकपा एमालेका पूर्वउपाध्यक्ष वामदेव गौतम आजदेखि औपचारिक रूपमा माधवकुमार नेपाल नेतृत्वको नेकपा (एकीकृत समाजवादी) मा प्रवेश गर्दै छन्। तर, गौतमले सञ्चालन गरेको 'नेकपा एकता राष्ट्रिय अभियान' दलका प्रवक्ता निमकान्त पाण्डे भने सो पार्टीमा नजाने निर्णयमा अडिग छन्।
२०७७ पुस ५ मा संसद विघटनपछि गौतमले ‘पार्टी एकता राष्ट्रिय अभियान’ भन्दै छुट्टै समूह बनाएका थिए। पछि त्यसै नाममा निर्वाचन आयोगमा दल दर्ता गराई ७१ सदस्यीय केन्द्रीय समिति गठन गरेका थिए। आज पत्नी तथा कोषाध्यक्ष कुमारी तुलसी थापासहित सोही समितिका सदस्यहरू नेकपा एसमा प्रवेश गर्ने तयारीमा छन्।
तर, कार्यक्रममा शारीरिक रूपमा सहभागी हुनेहरू १५ जना मात्र पुष्टि भएका छन्। बाँकीले सहमति जनाए पनि उपस्थिति जनाउन नपाउने बताइएको छ।
गौतमका प्रवक्ता तथा वरिष्ठ पत्रकार निमकान्त पाण्डे भने नेकपा एसमा नजाने अडानमा छन्। उनले भने, “भ्रष्टाचार मुद्दामा म लागेको छैन, त्यसैले एसमा जान सक्दिनँ। वामदेवलाई सहयोग गरिरहन्छु, तर पार्टी एकता भन्ने नाममा भ्रष्टाचारको रक्षा गर्न सक्दिनँ
उनले यसबारे केही दिनअघि बोलाइएको केन्द्रीय समितिको बैठकमा पनि सहभागी नभएको बताए।
गौतमले सुरुमा ‘नेकपा’ नामको पार्टी दर्ता गरे पनि सर्वोच्च अदालतको आदेशपछि त्यो नाम प्रयोग गर्न नपाउने भई पुनः ‘एमाले, पार्टी एकता राष्ट्रिय अभियान’ नाम राखिएको थियो। यद्यपि, एमाले र एस दुबै पार्टीसँग संवाद गर्दा नेतृत्वमा असहमति र असन्तुष्टि बढ्दै गयो।
अन्ततः अभियान कमजोर बन्दै जाँदा ७१ जना मात्रै बाँकी रहेका छन्। केही नेताहरूले वामदेवसँग दूरी बढाउँदै एसमा अलग्गै प्रवेश गर्ने तयारीसमेत गरेका छन्।
महासचिव डीबी कार्कीका अनुसार आज गौतमसँगै आफू, उपाध्यक्षहरू दुर्गा भण्डारी, रविन्द्र बम, ओम शर्मा, सचिव भगवती विष्ट, कोषाध्यक्ष तुलसी थापा र अन्य नेताहरू एसमा प्रवेश गर्दै छन्।
साथै, काठमाडौं उपत्यका कमिटीका २५, २ प्रदेश कमिटी, ९ जिल्ला कमिटी, साथै युवा र महिला संगठनका ११–११ सदस्यीय टोलीहरू पनि एसमा समाहित हुने बताइएको छ।
गौतमसँग असहमति जनाउँदै महेन्द्रराज शर्मा, इन्द्र सुब्बा, हरि काफ्ले र मेनुका कार्कीले भने आजै गौतमभन्दा ३ घण्टा अगाडि अलग्गै कार्यक्रममार्फत नेकपा एस प्रवेश गर्ने बताएका छन्।
