काठमाडौं — विद्यालय शिक्षा विधेयकका विषयमा सहमति नजुट्दा शिक्षा समितिको बैठक ढिलो गरी सुरु भएको छ। बिहान ८:३० बजे बोलाइएको बैठक आज साँझ ४ बजेपछि मात्र सुरु भएको हो।
शिक्षक महासंघले सरकारलाई दिएको अन्तिम म्याद (असार १५) पछि सडक संघर्ष स्थगित गरे पनि अन्तिम घडीसम्म सहमति जुट्न नसक्दा बैठक अन्योलमा परेको थियो। सहमतिको प्रयासस्वरूप महासंघका नेताहरू आइतबार बिहानै सिंहदरबार पुगेका थिए।
समितिबाट हिजै विधेयक पारित गर्ने तयारी भए पनि केही विवादास्पद विषयमा सहमति नहुँदा विधेयक पारित हुन सकेन। विशेषतः शिक्षक पदपूर्तिका प्रावधानमा विवाद देखिएको छ।
शिक्षा मन्त्रालयले पदपूर्ति प्रक्रिया ६० प्रतिशत आन्तरिक र ४० प्रतिशत खुला प्रतिस्पर्धाबाट गर्ने प्रस्ताव गरे पनि महासंघले यसै अनुपातको प्रस्तावमा सहमति जनाउँदै आएको छ। तर, प्राविधिक र कार्यान्वयन पक्षमा मतभेद रहेकाले वार्ता अवरुद्ध भएको हो।
दबाब बढाउँदै महासंघका नेताहरूले आज शिक्षा, विज्ञान तथा प्रविधि मन्त्री रघुजी पन्तसँग भेट गरेका छन्। मन्त्री पन्तले सत्तारूढ दलका सभापति शेरबहादुर देउवालाई भेटेर परिस्थितिबारे छलफल गरेका छन्।
सांसदहरू बिहानैदेखि सिंहदरबारमा उपस्थित भए पनि विधेयकमाथि सहमति नजुट्दा बैठक स्थगितजस्तै बनेको थियो।
