डडेल्धुरा– डडेल्धुराका २८ वर्षीय युवा व्यवसायी हरिसिंह पालीको कैलाली कारागारमा रहस्यमय मृत्यु भएपछि सुदूरपश्चिमका सात पहाडी जिल्लामा यातायात सेवा पूर्णरूपमा ठप्प भएको छ।
बैंकिङ्ग कसुरमा पक्राउ परेका पालीको मृत्यु प्रहरीको कुटपिटका कारण भएको आरोप लगाउँदै उनका आफन्त र स्थानीय व्यवसायीहरू आन्दोलित बनेका हुन्। उनीहरूले न्यायको माग गर्दै बैतडी, डडेल्धुरा, दार्चुला, बाजुरा, अछाम र बझाङ लगायतका जिल्लाको सवारी आवागमन अवरुद्ध गरेका छन्।
प्रहरीका अनुसार पालीलाई कैलाली जिल्ला अदालतले २९ फागुनमा बैंकिङ्ग कसुरअन्तर्गत १० दिन कैद र दुई लाख रुपैयाँ जरिवानाको सजाय सुनाएको थियो। सोही सजाय कार्यान्वयन गर्न पालीलाई डडेल्धुराको अमरगढी नगरपालिका–५ स्थित तुफानडाँडाबाट पक्राउ गरिएको थियो। तर, पक्राउपछिको दुई दिनमै उनको कैलाली कारागारमै मृत्यु भएको थियो।
मृतकका परिवारले उनको मृत्युलाई शंकास्पद ठहर गरेका छन्। उनका काका पदमसिंह पालीले “कारागारभित्रै हरिसिंहमाथि यातना दिइयो, त्यो नै उनको मृत्युको कारण हो,” भन्दै दोषीमाथि कडा कारबाहीको माग गरेका छन्।
उता, स्थानीय प्रशासनले घटनाको छानबिन थालिएको जनाएको छ। तर आक्रोशित पीडित परिवार र स्थानीयवासीहरूले निष्पक्ष छानबिन र दोषीमाथि कानुनी कारबाही नहुन्जेलसम्म आन्दोलन नरोकिने चेतावनी दिएका छन्।
सातवटै पहाडी जिल्लामा सवारी साधन चल्न नसक्दा जनजीवन प्रभावित भएको छ। अत्यावश्यक सेवा आपूर्तिमा समेत समस्या देखिन थालेको छ।
