अहमदाबाद — लण्डन जान लागेकी एक भारतीय युवती भूमि चौहान भीषण विमान दुर्घटनाबाट संयोगवश ज्यान जोगाउन सफल भएकी छन्। ट्राफिक जामका कारण १० मिनेट ढिला हुँदा उनी एयर इन्डिया (AI-171) को उडान चढ्नबाट छुटिन्, जुन विमान उडान केही समयमै दुर्घटनाग्रस्त भएको थियो।
"मेरो शरीर अझै काँपिरहेको छ," चौहानले रिपब्लिक टिभीसँगको कुराकानीमा भनिन्, "ज्यान जोगियो भन्ने कुरा सोच्दा पनि अझै डर लागिरहेको छ।" उनका अनुसार उनी दिउँसो झन्डै १:३० बजे सरदार वल्लभभाई पटेल अन्तर्राष्ट्रिय विमानस्थलबाट फर्किएकी थिइन्। उडान भने १:३८ बजे प्रस्थान गरेको थियो।
केही मिनेटमै विमान अहमदाबाद नजिकको बस्ती क्षेत्रमा दुर्घटना भएको थियो। "म पूरै शून्य अवस्थामा थिएँ। भगवानप्रति आभारी छु, मेरो गणपति बप्पाले मलाई बचाउनुभयो," उनले भनिन्।
भूमि चौहान लण्डन फर्किन एयर इन्डियाको सो उडानमा एक्लै यात्रा गर्न लागेकी थिइन्। दुई वर्षपछि बिदामा भारत आएकी उनी लण्डनमा आफ्ना पतिको साथ बस्छिन्। "त्यो १० मिनेटको ढिलाइ नै मेरो जीवनको सबैभन्दा ठूलो मोड बन्यो। म यो सबै कसरी व्यक्त गरूँ, मलाई नै थाहा छैन," उनले आँखा रसाउँदै सुनाइन्।
दुर्घटनामा ज्यान गुमाउनेको सङ्ख्या भयावह छ। अहमदाबादका प्रहरी आयुक्त जीएस मलिकले हालसम्म २०४ जनाको मृत्यु पुष्टि भएको जनाएका छन्। "केही बाँचेका हुन सक्छन् तर अहिलेसम्म हामीले २०४ जनाको शव निकालिसकेका छौँ," मलिकले बताए।
