काभ्रेपलाञ्चोक । यहाँको चौँरीदेउराली गाउँपालिकाले आउँदो शैक्षिकसत्रदेखि जलवायु परिवर्तनलाई स्थानीय विद्यालयका पाठ्यक्रममा समावेश गर्ने भएको छ ।
गाउँपालिकाले जलवायु परिवर्तन अनुकूलन योजना तथा विपद् व्यवस्थापनलाई प्रभावकारी रूपमा कार्यान्वयन गर्न यस्तो निर्णय भएको गाउँपालिका अध्यक्ष रेणुका चौलागाईँले बताइन् । ‘जलवायु परिवर्तनसम्बन्धी विषयलाई अनिवार्य रूपमा लागू गर्न कार्ययोजना बनेको छ । यसलाई स्थानीय पाठ्यक्रममा समावेश गर्ने निर्णय पनि भइसकेको छ,’ उनले भनिन् ।
यसैबीच, स्थानीय युवा समूहले जलवायु परिवर्तनसम्बन्धी विषयमा गाउँपालिकाको ध्यानाकर्षण गराउँदै बाढीपहिरो, सुक्खा तथा अनावृष्टिजस्ता प्राकृतिक विपद्ले स्थानीय जीवनमा गम्भीर असर पुर्याइरहेकाले व्यवहारिक उपाय अवलम्बन गराउन गाउँपालिकाको ध्यानाकर्षण गराएको छ ।
