काठमाडौं— सहरी विकास मन्त्रालयअन्तर्गतको पुल र सडक निर्माणको अवस्था हेर्ने हो भने लज्जास्पद अवस्था देखिएको छ ।
चालु आर्थिक वर्षको ८ महिनाको अवधिमा सो मन्त्रालयले ग्रामीण कालोपत्रे सडक निर्माण गर्ने लिएको लक्ष्यमा जम्मा ८ प्रतिशत मात्रै प्रगति देखिएको छ ।
चालु आर्थिक वर्ष २०८१र८२ मा सहरी विकास मन्त्रालयले १०० किलोमिटर ग्रामीण कालोपत्रे सडक निर्माण हुने लक्ष्य लिएको थियो । तर फागुन मसान्तसम्म (८ महिनामा) ८.६ किलोमिटर मात्रै सडक निर्माण गरेको छ ।
झापा, रोल्पा र पर्वत गरी ३ जिल्लाहरूमा जम्मा ८.६ किमि निर्माण भएको मन्त्रालयले जनाएको छ ।
त्यसैगरी जम्मा ३० वटा स्थानीय सडक पुल निर्माण गर्ने लक्ष्य रहेकोमा ५ वटा मात्रै निर्माण गरेको मन्त्रालयले जनाएको छ । यसमध्ये
१. गेरूका नदी पुल, सर्लाही,
२.माडर पुल निर्माण, सिरहा न.पा.,
३. तपोवन चौलानी नदी मोटरेवल पुल दार्चुला,
४. लिखु खोलापुल, सोलुखुम्बु र
५. सुखचैना बुधौराको पूर्व पुल सिरहा गरी ५ वटा सडकपुल निर्माण सम्पन्न भएको छ ।
त्यसैगरी ३३० वटा झोलुङ्गे पुल निर्माण गर्ने लक्ष्य रहेकोमा हालसम्म १६२ वटा झोलुङ्गे पुल निर्माण सम्पन्न भएको मन्त्रालयले सार्वजनिक गरेको रिपोर्टमा उल्लेख छ ।
