काठमाडौं— गए राति कलंकीको नागार्जुन नगरपालिका–७, स्युचाटारस्थित एक कच्ची घरमा आगलागी भएको छ । स्थानीय कृष्णहरि श्रेष्ठको एक तलाको कच्ची घरमा राति पौने १० बजे लागेको जिल्ला प्रहरी परिसर काठमाडौँका प्रवक्ता एवं प्रहरी उपरीक्षक अपिल बोहराले जानकारी दिए ।
कच्ची घर राति ९ः४० मा लागेको आगो १०ः५० बजे नियन्त्रणमा आएको प्रहरी उपरीक्षक बोहराले बताए ।
साँघुरो ठाउँ भएकाले ठूलो दमकल छिर्न नसक्दा आगो निभाउन कठिनाइ भएको उनको भनाइ छ । तर, चन्द्रागिरि नगरपालिका र ललितपुर महानगरपालिकाको सानो दमकलको सहयोगमा सुरक्षाकर्मी र स्थानीयले आगो निभाएका थिए ।
आगालगीमा १५ लाख रुपैयाँबराबरको क्षति अनुमान गरिएको छ । आगो निभाउन कालीमाटी प्रहरी वृत्तका प्रमुख रूपक खड्काको नेतृत्वमा टोली खटाइएको थियो । स्वयम्भू वृत्तका प्रहरी टोली समेत परिचालन गरिएको थियो ।
विद्युत् चुहिएर आगो लागेको प्रहरीको अनुमान छ ।
