काठमाडौं - आषाढ शुक्ल एकादशी अर्थात् हरिशयनी एकादशीमा क्षीरसागरमा सुत्नुभएका भगवान् विष्णु आज हरिबोधिनी एकादशीका दिन जागृत हुने धार्मिक मान्यतासहित देशभर विशेष पूजा र अनुष्ठान मनाइदैँछ । कात्तिक शुक्ल एकादशीका दिन भगवान् विष्णुको प्रतीक तुलसीलाई दामोदरसँग विवाह गराइन्छ। भक्तजनले घरघरमा तुलसीको मठ गाईको गोबर र रातो माटोले सजाएर फूलमालाले विशेषरूपमा सिँगार्दै पूजा गरिरहेका छन्।
तुलसी विष्णुप्रिया भएकाले आस्थाका साथ तुलसी विवाह गराउँदा मनोकामना पूरा हुने धार्मिक विश्वास छ। विष्णुको पूजा गरिएको घरलाई सुरक्षित र पवित्र मान्ने परम्पराले हिन्दू धर्मावलम्बीले घरमा तुलसीको मठ बनाउने चलन राखेका छन्। तुलसीको महिमा स्वास्थ्य लाभका लागि पनि महत्वपूर्ण मानिन्छ; यसको पात, डाँठ वा फूलको रसले रुघाखोकीजस्ता रोग निको हुने विश्वास छ भने, तुलसीको चिया रोग प्रतिरोधी क्षमता बढाउन सहयोगी रहेको आयुर्वेद चिकित्सकहरू बताउँछन्।
आज काठमाडौँ उपत्यकाका चार नारायण मन्दिर, भक्तपुरको चाँगुनारायण, ललितपुरको विशङ्खुनारायण, काठमाडौँका शेषनारायण र इचँगुनारायणमा विशेष मेला लागिरहेको छ। बूढानीलकण्ठ नारायणस्थानमा पनि विशेष मेला आयोजना गरिएको छ, जसमा हजारौं भक्तजनले सहभागिता जनाइरहेका छन्।
