भक्तपुर— भक्तपुरको गट्ठाघरमा साउन ३१ मा ट्रकले स्कुटरलाई ठक्कर दिएको घटनाबारे छानबिन समितिले ट्रकचालकको लापर्बाहीका कारण दुर्घटना भएको निष्कर्ष निकालेको छ ।
बा ४९ प ८९४४ नम्बरको स्कुटरलाई ना ६ ख २१७३ नम्बरको ट्रकले ठक्कर दिँदा ओखलढुङ्गाको चिसङ्खुगढी–४ का उत्तम कोइरालाको घटनास्थलमा नै मृत्यु भएको थियो । प्रहरी उपरीक्षक प्रजित केसी नेतृत्वको छानबिन समितिले सो दुर्घटनाबारे तयार पारेको प्रतिवेदन मङ्गलबार उपत्यका प्रहरी कार्यालयका प्रमुख, प्रहरी अतिरिक्त महानिरीक्षक (एआईजी) किरण वज्राचार्यलाई बुझाएको छ ।
वज्राचार्यले ट्रकचालकको गम्भीर लापर्बाहीले दुर्घटना भएको निष्कर्ष प्रतिवेदनमा उल्लेख गरिएको जानकारी दिए । समितिले दुर्घटनास्थलको सीसीटीभी फुटेज, प्रत्यक्षदर्शीको बयान तथा घटनास्थलमा तैनाथ ट्राफिक प्रहरीसँग सोधपुछलगायत प्राविधिक विषयमा छानबिन गरको थियो ।
छानबिन समितिसँगको बयानमा स्कुटरलाई ठक्कर दिने ट्रकचालक सर्लाहीका सतेन्द्र श्रेष्ठले स्कुटरलाई आफूले नदेखेको र एक्कासि ट्रकमा ठोक्किएको आवाज आएपछि रोकेर हेर्दा मात्र दुर्घटना भएको देखिएको बयान दिएको बताइएको छ ।
घटनास्थलको सीसीटीभी फुटेजमा स्कुटरसहित चालकलाई ट्रकले केही मिटर लछारेको देखिएको छ । एआईजी वज्राचार्यले घटनास्थलको छानबिन गर्दा कम्तीमा ३० मिटरको दुरीमा ट्राफिक प्रहरीले गति सीमित चेकजाँच गरेको र उक्त चेकजाँचभन्दा अघि दुर्घटना भएकाले ट्राफिक प्रहरीको कमजोरी नदेखिएको बताए।
उनले भने, 'दुर्घटना हुनुमा ट्राफिक प्रहरीको पो कमजोरी छ कि भनेर गम्भीर रूपमा हेर्यौँ, चेकजाँचमै नपरेका स्कुटर र ट्रक चेकजाँचभन्दा ३० मिटरअघि बढेपछि भएको पाइयो, दुर्घटनाको कारण ट्रकचालकको लापर्बाही नै देखिएको छ ।'
प्रहरी उपरीक्षक केसी नेतृत्वको समितिले ट्रकभन्दा पछाडि भएको अर्का गाडी चालकसँग पनि सोधपुछ गरेको थियो। सो दुर्घटनाबारे जिल्ला प्रसाशन कार्यालय भक्तपुरले पनि छानबिन गरिरहेको छ । भक्तपुरका सहायक प्रमुख जिल्ला अधिकारी डोरेन्द्र निरौला, मेकानिकल इन्जिनियरसहितको छानबिन समितिले ट्रकको यान्त्रिक परीक्षणसहितको रिपोर्ट प्रतिवेदन आगामी आइतबारसम्म तयार गर्ने गरी काम अघि बढाएको छ ।
