बिर्तामाेड / झापाको हल्दीबारीमा जंगली हात्तीको आक्रमणमा परी चार जना घाइते भएका छन् ।
हात्तीको आक्रमणबाट हल्दीबारी गाउँपालिका –५ का गौरादेवी पौडेल, सोही ठाउँका नगेन्द्र पौडेल, पार्वतादेवी पौडेल र चेतन पौडेल घाइते भएका जिल्ला प्रहरी कार्यालय झापाले जनाएको छ ।
उनीहरूको मेची प्रादेशिक अस्पताल भद्रपुरमा उपचार भइरहेको छ । उनीहरूलाई हल्दीबारी गाउँपालिका –४ को कालीमन्दिर टोलमा राति करिब २ः१५ बजे आएको जंगली हात्तीले आक्रमण गरेको थियो ।
गाउँ पसेका हात्ती खेदाउने क्रममा हात्तीको आक्रमणमा परी उनीहरू घाइते भएका हुन् । हात्तीले स्थानीय जयप्रकाश दाहालको अन्दाजी एक बिगाहाको धान पूर्ण रूपमा क्षति पुर्याएको छ ।
त्यस्तै विजय लावतीको थ्रेसर लगाएको करिब ६ मन धान खाएर नष्ट गरिदिएको छ भने धनबहादुर गहतराजको अटोमा समेत क्षति पुर्याएको स्थानीयले बताएका छन् ।
