बिर्तामोड / झापामा सवारी दुर्घटनामा परि श्रीमान् श्रीमतीको मृत्यु भएको छ । पूर्वपश्चिम राजमार्ग अन्तरगत झापाको दुर्गापुरमा हिजो दिउँसो भएको सवारी दुर्घटनामा परि दुई जनाको मृत्यु भएको हो । मृत्यु हुनेमा अर्जुनधारा -६ का ५२ वर्षीय नरेन्द्र मैनाली र ५० वर्षीया सीतादेवी मैनाली रहेका छन् । कनकाई नगरपालिका -७ स्थित दुर्गापुरमा पूर्वबाट पश्चिमतर्फ जाँदै गरेको को १ ख ६७९४ नम्बरको बस र विपरीत दिशाबाट आउँदै गरेको मे ७ प ५०९२ नम्बरको मोटरसाइकल एक आपसमा ठक्कर खाँदा मोटरसाइकलमा सवार दुई जनाको मृत्यु भएको प्रहरीले जनाएको छ ।
दुर्घटनामा परि घाइते भएका उनीहरूलाई बिर्तामोडस्थित बीएण्डसी अस्पतालमा पुराउनसाथ चिकित्सकले मृत घोषित गरेको थियो । दुवै जना मोटरसाइकलमा सवार रहेका थिए । दुर्घटनामा ठक्कर दिने बस र बस चालक जिल्ला मोरङ सुन्दरहरैचा -६ का बर्ष ४० को भुपाल देवानलाई इलाका प्रहरी कार्यालय सुरुङ्गाले नियन्त्रणमा लिएर अनुसन्धान शुरु गरेको जिल्ला प्रहरी कार्यालय झापाले जनाएको छ ।
