खोटाङ / जिल्ला निर्वाचन कार्यालय खोटाङले मतदानस्थलमा निर्वाचन सामग्री पठाउन सुरु गरेको छ । जिल्ला निर्वाचन अधिकारी राजेश गौतमका अनुसार मङ्गलबारदेखि निर्वाचन सामग्री पठाउन सुरु गरिएको हो ।
दुई नगरपालिका र आठ गाउँपालिका रहेको खोटाङमा १३६ मतदानस्थल, १९४ स्थायी र दुईवटा अस्थायी मतदान केन्द्र रहेका छन् ।
गौतमका अनुसार आसन्न ४ मङ्सिरमा हुने निर्वाचनका लागि मतदाता नामावली, मतपेटिका, छेकाबारा, रबर म्याट, सुरक्षण सिल, स्वस्तिक छापलगायतका ६२ प्रकारका निर्वाचन सामग्री पठाउन सुरु गरिएको हो ।
निर्वाचन कार्यालयमा निर्वाचन सामग्री बुझ्ने र रुजु गर्ने मतदान अधिकृत, सहायक मतदान अधिकृत, अन्य कर्मचारी, सुरक्षाकर्मीको भीड लागेको छ।
पहिलो चरणमा दूरीका हिसाबले टाढा पर्ने बराहपोखरी गाउँपालिका, जन्तेढुंगा गाउँपालिका लगायतका पालिकाका मतदान स्थलका लागि निर्वाचन सामग्री पठाइएको छ । बुधबारसम्ममा सबै मतदान केन्द्रमा खटिएका कर्मचारीलाई मतदान सामग्री बुझाइसकिने निर्वाचन कार्यालयले जनाएको छ ।
आसन्न निर्वाचनमा खोटाङका एक लाख ४२ हजार ७९२ मतदाताले मताधिकार उपयोग गर्दैछन् ।
यस्ता छन् निर्वाचन सामग्री
निर्वाचन सामग्रीको सूचीमा सियोधागोदेखि पुरुष तथा महिला कार्ड, हातहतियार निषेध कार्ड, मोबाइल निषेध कार्ड, धूमपान निषेध कार्डलगायत छन् । मतदान केन्द्रमा स्टाम प्याड, स्टाम प्याड मसी, पर्मानेन्ट मार्कर, मार्कर पेन, स्केल मेटल, कैंची, ग्लुस्टिक, पञ्चिङ मेसिन, सोसर, प्लाष्टिक थैलो, प्लाष्टिक बोरा, दुई मिटर कोरा कपडा, कोरा कपडाको थैलो, चार पिस प्याकेट लाहा, १० पिस प्याकेट जेल पेन (कालो), चार पिस प्याकेट जेल पेन (रातो), स्टिच, स्टिच मेसिन पिन, परिचयपत्र कार्ड, परिचयपत्र प्लाष्टिक कभर, परिचय–पत्र डोरी, सेनीटाइजर, सर्जिकल मास्क, प्राथमिक उपचार सामग्री पठाइएको छ ।
यस्तै, पोलबुक, पुसपिन (प्याकेट), क्लिप पिन (प्याकेट), प्लाष्टिक सुतली, प्याकिङ टेप, नेपाली कागजको खाम, नेपाली खाम कपडा भएको, सेतो कागज, रेकर्ड फाइल फित्ता सहित, धागो, सियो, निर्वाचन पोस्टर, मतपेटिका स्टिकर, भित्र कार्ड, बाहिर कार्ड, पुरुष कार्ड, महिला कार्ड, अन्य कार्ड, हातहतियार निषेध कार्ड, मोबाइल निषेध कार्ड, धूम्रपान निषेध कार्ड, मतदाता क्रम संख्या कार्ड, मतकेन्द्र कार्ड, मत संकेत गर्ने नमुना, अस्थायी मतदाता नामावली लगायतका सामग्री पठाइएको निर्वाचन कार्यालयले जनाएको छ ।
