ताप्लेजुङ / ताप्लेजुङको घ्याङडाँडामा शनिबार बिहान अटो दुर्घटना हुँदा दुईजनाको ज्यान गएको छ भने एक जना गम्भिर घाइते भएका छन् ।
फुङलिङ नगरपालिका –८ बेजम्बुबाट सुकेटार विमानस्थल तर्फ जाँदै गरेको १–००२–००३ ह ३९०० नम्बर अटो दोखुको नाम्लेपाटी माथि घ्याङडाँडामा दुर्घटना भएको हो ।
दुर्घटनामा परी पाथीभरा याङ्वरक गाउँपालिका –१ नाङ्खोल्याङका करिब ७५ वर्षीय धनबहादुर गुरुङ र उनका नाती फुङलिङ ८ दोखुका ११ बर्षका इशान गुरुङको ज्यान गएको जिल्ला प्रहरी कार्यालय ताप्लेजुङले जनाएको छ ।
काठमाडौंमा उपचारको लागि जान हिँडेका ७५ वर्षीया गुरुङ घरबाट निस्कनासाथ दुर्घटनामा परेको प्रहरीले जनाएको छ । नातीबाजे शनिबार काठमाडौं जानको लागि सुकेटार विमानस्थल जान हिंडेका थिए ।
प्रमुख प्रहरी नायब उपरीक्षक कैलास राईले घटनास्थलबाट घाइते अटो चालक गंगाराम राईलाई उपचारका लागि जिल्ला अस्पताल ल्याइएको जानकारी दिए ।
