बिर्तामोड / मंसिर ४ गते हुने प्रतिनिधिसभा र प्रदेशसभा निर्वाचनका लागि झापामा १३ हजार नयाँ मतदाता थपिएका छन् । जिल्ला निर्वाचन कार्यालय झापाका अनुसार गत वैशाखमा सम्पन्न स्थानीय निर्वाचन यता उक्त सङ्ख्यामा मतदाता थपिएका हुन् ।
२३ हजार नयाँ मतदाता थपिएसँगै झापामा कुल मतदाताको संख्या छ लाख ६३ हजार ३११ पुगेको जिल्ला निर्वाचन अधिकृत तुलसी नेपालले जानकारी दिए । पाँच वटा निर्वाचन क्षेत्रका कुल मतदातामध्ये महिलाको संख्या तीन लाख ३२ हजार २५९, पुरुषको संख्या तीन लाख ३१ हजार ४४ र अन्य मतदाता आठ जना रहेका छन् ।
झापाको क्षेत्र नम्बर –१ मा सबै भन्दा थोरै एक लाख २० हजार ३७५ मतदाता छन् भने क्षेत्र नम्बर –५ मा सबैभन्दा धेरै एक लाख ५४ हजार २८९ मतदाता छन । क्षेत्र नम्बर –२ मा एक लाख ३४ हजार ९१, –३ मा एक लाख ३१ हजार ४३२ र क्षेत्र नम्बर –४ मा एक लाख २३ हजार १२४ मतदाता रहेका छन् । त्यस्तै निर्वाचनमा खटिने कर्मचारी र कैदिबन्दिहरुसहित झापामा छ हजार २४२ अस्थायी मतदाता रहेका छन् ।
त्यस्तै आठ नगरपालिका र सात गाउँपालिका गरी १५ वटा स्थानीय तह रहेको झापामा २८५ मतदान स्थल र ७६६ मतदान केन्द्र रहेको प्रमुख जिल्ला अधिकारी छविलाल रिजालले जानकारी दिए ।
सुरक्षाको दृष्टिकोणले मतदान स्थललाई तीन भागमा वर्गीकरण गरिएको छ । जसमा २७१ मतदान केन्द्र अति संवेदनशील, ३८१ केन्द्र संवेदनशील र ११४ केन्द्र सामान्य रहेको प्रजिअ रिजालले बताए ।
