बिर्तामोड / झापामा बसको ठक्करबाट मोटरसाइकल चालकको मृत्यु भएको छ । मृत्यु हुनेमा दमक–५ बस्ने २५ वर्षीय निर्मल दास रहेका छन् । बुधवार साँझ ६ बजे पूर्वपश्चिम राजमार्गअन्तर्गत शिवसतासी –९ स्थित मिलन चोकमा पूर्वबाट पश्चिमतर्फ जाँदै गरेको प्रदेश १–०१–०१२ प ४९९६ नम्बरको मोटरसाइकललाई विपरीत दिशाबाट आउँदै गरेको मे १ ख २३२१ नम्बरको यात्रुवाहक बसले ठक्कर दिएको थियो ।
मोटरसाइकलमा सवार अर्का एक जना गम्भीर घाइते भएका छन् । उनको बिएन्डसी अस्पताल बिर्तामोडमा उपचार भइरहेको प्रहरीले जनाएको छ । मोटरसाइकलको पछाडि सवार १८ वर्षीय सौरभ मदक गम्भीर घाइते भएको जिल्ला प्रहरी कार्यालय झापाले जनाएको छ । दुर्घटनामा संलग्न ध्रुव तारा यातायातको उक्त बस र चालकलाई इलाका प्रहरी कार्यालय झिलझिलेले नियन्त्रणमा लिएको छ ।
