बिर्तामोड / झापाको शिवसताक्षीमा बुधबार दिउँसो मलामी बोकेको बस दुर्घटना हुदाँ २८ जना घाईते भएका छन् ।
कनकाई नदीको मुक्तिघाटमा शवको दाहसंस्कार सकेर मलामी लिएर कुञ्जिबारी फर्किँदै गरेको ना ७ ख २६५१ नम्बरको बस पूर्वपश्चिम राजमार्ग अन्तर्गत शिवसताक्षीको वडा नम्बर ९ झरना पुल नजिकै दुर्घटनामा परेको हो ।
दुर्घटनामा परी २८ जना घाइते भएका र तीन जनाको अवस्था भने गम्भीर रहेको इलाका प्रहरी कार्यालय झिलझिलेले जनाएको छ । घाइते सबैलाई उपचारका लागि बिर्तामोडस्थित बीएन्डसी अस्पतालमा ल्याइएको छ ।
प्रहरीका अनुसार मलामी बस राजमार्ग दक्षिण किनारको रुखमा गएर ठोकिएको थियो । सोही दिशाबाट आउँदै गरेको अर्को बसलाई जोगाउन खोज्दा मलामी बोकेको बस राजमार्ग दक्षिण रुखमा ठोकिएको स्थानीयबासीले बताएका छन् ।
