ताप्लेजुङ / ताप्लेजुङको मैवाखोलामा मंगलबार राति ट्याक्टर दुर्घटना हुँदा चार जनाको घटनास्थलमै मृत्यु भएको छ ।
मृत्यु हुनेमा ट्याक्टर चालक मैवाखोला –५ काम्सङका ३१ वर्षका पासाङ शेर्पा, उनको भाइ २४ वर्षका फुर्बा शेर्पा, मैवाखोला –४ ओदकका २२ वर्षकी शर्मिला शेर्पा र उनकी बहिनी १७ वर्षकी लाकी शेर्पा रहेका छन् ।
तेल्लाबुङबाट कम्साङतर्फ जाँदै गरेको ५६५५ नम्बरको ट्याक्टर मैवाखोला गाउँपालिका –४ साँघुस्थित याम्फेवा खोला नजिकै दुर्घटना भएको जिल्ला प्रहरी कार्यालय ताप्लेजुङका डीएसपी कैलाश राईले जानकारी दिए ।
राईका अनुसार उनीहरु आमा बिरामी भएपछि राति १२ बजे ढुङगेसाँघुबाट ट्याक्टर लिएर घरतर्फ जाँदै गरेको अवस्थामा दुर्घटनामा परेका हुन् ।
चालक पासाङ सो ट्याक्टरका मालिकसमेत हुन् । थप विवरण आउन बाँकी रहेको प्रहरीले जनाएको छ ।
