बिर्तामोड / झापाको बिर्तामोड २ मा दुईवटा मोटरसाइकल एकआपसमा ठोकिएर दुर्घटना हुँदा दुईजनाको मृत्यु भएको छ । मृत्यु हुनेमा बाह्रदशी गाउँपालिका वडा नम्बर २ का २५ वर्षीय अनिस साउदेन र सोही स्थानका ४३ बर्षिय भोलाराज भुजेल रहेका छन् । दक्षिणबाट उत्तरतर्फ आउँदै गरेको मे ५ प १६०४ न को मोटरसाइकल र विपरित दिशाबाट जाँदै गरेको मे ३ प ५५८० न को मोटरसाइकल एक आपसमा ठोक्किँदा दुवै मोटरसाइकल चालकको मृत्यु भएको हो ।
मे ५ प १६०४ नम्बरको मोटरसाइकल चालक सोही स्थानका भुजेल, उनकी श्रीमती ४२ बर्षिया चन्द्रकला भुजेल, छोरी ९ बर्षिया प्रशना भुजेल घाईते भई उपचारको लागि बीएण्डसी अस्पताल बिर्तामोड पठाइएकोमा उपचारको क्रममा दुवै मोटरसाइकल चालकको मृत्यु भएको प्रहरीले जनाएको छ । दुवै मोटरसाइकललाई नियन्त्रणमा लिएर घटना सम्बन्धी थप अनुसन्धान कार्य भइरहेको जिल्ला प्रहरी कार्यालय झापाले जनाएको छ ।
