बिर्तामोड / प्रतिबन्धित लागूऔषध ब्राउन सुगर सहित झापाका बिभिन्न स्थानबाट प्रहरीले ४ जनालाई पक्राउ गरेको छ । पक्राउ पर्नेमा इलामको माई नगरपालिका -२ बस्ने २२ वर्षीय केबिन्द्र गोले , २७ वर्षीय गोम्बु दोर्जे गोले , र पाँचथरको फाल्गुनन्द गाउपालिका -५ का ३२ वर्षीय सन्त लिम्बू रहेका छन । मंगलबार बेलुका लागूऔषध नियन्त्रण ब्युरो काँकरभिट्टा र इलाका प्रहरी कार्यालय अनारमनिबाट खटिएको प्रहरी टोलीले बिर्तामोड -५ स्थित पाथिभरा टोलबाट उनीहरूलाई पक्राउ गरेको हो । लागूऔषध सहित पक्राउ परेका उनीहरूलाई नियन्त्रणमा लिई इलाका प्रहरी कार्यालय अनारमनीमा राखी थप अनुसन्धान कार्य भइरहेको प्रहरीले जनाएको छ ।
यस्तै प्रतिबन्धित लागूऔषध ब्राउन सुगरसहित रामेछाप नगरपालिका- ८ बस्ने ३० वर्षीय विजय लामा पक्राउ परेका छन् । मङ्गलवार अपराह्न साढे ४ बजे मेचीनगर नगरपालिका- ६ मेची पुल छेउमा इलाका प्रहरी कार्यालय काँकडभिट्टा र लागू औषध नियन्त्रण ब्युरो काँकडभिट्टाबाट खटिएको प्रहरी टोलीले भारतबाट नेपालतर्फ पैदल आउँदै गरेका लामालाई ७५ ग्राम ब्राउन सुगरसहित पक्राउ गरेको हो । पक्राउ परेका लामाको सम्बन्धमा थप अनुसन्धान भइरहेको जिल्ला प्रहरी कार्यालय झापाका प्रवक्ता बसन्त पाठकले जानकारी दिए ।
