झापा / सोमबार बिहान मनास्लु हिमालमा हिमपहिरो जादा ५ जना नेपाली बेपत्ता भएका छन् । हिमाल आरोहणका लागि गएका ५ जना नेपाली बेपत्ता भएको जिल्ला प्रहरी कार्यालय गोरखाले जनाएको छ । हिमपहिरोमा पुरिएर बेपत्ता हुनेहरूमा दावा शेर्पा, फुरिता शेर्पा, निग्मा दोर्जे शेर्पा, लाक्पा तामाङ र जितबहादुर शेर्पा रहेका छन् । प्रहरीका अनुसार सोमबार बिहान करिब ११ बजेतिर सो हिमालमा हिमपहिरो खसेको हो ।
हिमपहिरोमा पुरिएर बेपत्ता भएकाहरूको खोजी तथा उद्धारका लागि काठमाडौँबाट हेलिकप्टर पठाइएको छ । सो हिमाल आरोहण गर्न गएका अन्य विदेशी र केही नेपाली सहयोगीहरू भने मनास्लु आधार शिविरमै रहेको जनाइएको छ । उनीहरूको उद्धारका लागि सिम्रिक एयर र एभरेस्ट एयरका हेलिकप्टर त्यहाँ पुगेका छन् । तर मौसममा आएको खराबीका कारण उद्धार कार्य र बेपत्ताहरूको खोजीमा कठिनाइ भएको छ ।
