काठमाडौँ / भक्तपुरको मध्यपुर ठिमी नगरपालिका वडा नं -१ लोकन्थलीमा एक नाबालकको शुक्रवार बिहान गाडीले किचेर मृत्यु भएको छ । मृत्यु हुनेमा सिन्धुपाल्चोक त्रिपुरासुन्दरी गाउपालिका वडा नं -५ घर भई लोकन्थली बस्ने केशवलाल श्रेष्ठको छोरा सलिन श्रेष्ठ रहेका छन् । लोकन्थलीस्थित त्रिपुरासुन्दरी ग्रिल उद्योग अगाडि खेल्ने क्रममा गाडिमुनि पसेकालाई सलिनलाई बा ५ च ७८१७ नम्बरको निसान गाडीले किचेको हो ।
खानेपानी ढुवानी गर्ने काममा प्रयोग भइरहेको उक्त गाडी केही क्षण रोकेको बेलामा बालक गाडीमुनी पसेको र चालकले उक्त गाडी अगाडि बढाउने क्रममा बालकलाई किचेपछि गम्भीर घाइते बनाएको प्रहरीले जनाएको छ । त्यसपछि तत्कालै उपचारका लागि लोकन्थलीकै समिट अस्पताल लगिएका बालकको उपचारका क्रममा मृत्यु भएको थियो । घटनापछि प्रहरीले चालक र सवारीलाई नियन्त्रणमा लिई आवश्यक अनुसन्धान प्रक्रिया अगाडि बढाएको छ ।
