झापा / अछाममा पहिरोले पुरिएर ८ जनाको मृत्यु भएको छ । कमलबजार नगरपालिका र ढकारी गाउँपालिकामा पहिरोमा पुरिएर थप ६ जनाको मृत्यु भएपछि मृतकको संख्या ८ पुगेको स्थानीय प्रशासनले जानकारी दिएको छ ।
कमलबजार नगरपालिका -६ मा पहिरोले घर पुरिँदा बेपत्ता भएका ७ मध्ये थप चार जनाको शव भेटिएको सहायक प्रमुख जिल्ला अधिकारी दिपेश रिजालले जानकारी दिए । उनका अनुसार पहिरोमा पुरिएका अन्य तीन जनाको खोजी भइरहेको छ ।
ढकारी गाउँपालिका -६ मा पनि पहिरोले घर पुरिँदा दुई जनाको मृत्यु भएको रिजालले बताए । उनका अनुसार तीनजनालाई घाइते अवस्थामा उद्धार गरिएको छ । उनीहरूको उद्धारका लागि हेलिकोप्टर मगाइएको छ । यसअघि तुर्माखाद गाउँपालिका–५ काँडामा घर पुरिँदा २ जनाको शव फेला परेको थियो भने सात जना अझै बेपत्ता छन् ।
