झापा / कञ्चनपुरमा जातीय विभेद गरेको आरोपमा पक्राउ परेका पुजारी धरौटीमा रिहा भएका छन् । गत भदौ १६ गते ऋषि पञ्चमीका दिन भीमदत्त नगरपालिका -५ शुकासाल की २८ वर्षीया सन्जु नेपालीलाई भीमदत्त नगरपालिका-१० गड्डाचौकीका ४५ वर्षीय पुजारी सहदेव भट्टले अपमान गरी जातीय विभेद गरेको आरोपमा उनी पक्राउ परेका थिए ।
ति महिलाले जातीय विभेद गरेको आरोपमा पुजारी सहदेव भट्टका विरुद्ध भदौ १९ गते जिल्ला प्रहरी कार्यालयमा उजुरी दिएकी थिइन् ।
पीडितको उजुरीपश्चात आरोपित पुजारीलाई प्रहरीले भदौ १९ गते नै पक्राउ गरी घटनाको अनुसन्धान सुरु गरेको थियो ।
प्रहरीले सरकारी वकिल कार्यालयमार्फत आरोपित विरुद्ध भदौ २७ गते जातीय छुवाछुत तथा दुर्व्यवहार अन्तर्गत जिल्ला अदालतमा मुद्दा दर्ता गरेकोमा जिल्ला अदालतका न्यायाधीश धुर्वकुमार शाहको भदौ २७ गते बसेको इजलासले आरोपित भट्टलाई १० हजार रुपियाँ धरौटीमा रिहा गर्ने आदेश दिएको हो ।
ऋषि पञ्चमीका दिन महाकाली नदीको भुजेला घाटमा पुजा गर्ने क्रममा पूजापाठका लागि पुजारीलाई आग्रह गर्दा पुजारीले गोत्र सोध्दा दलित भएको थर खुलेपछि पूजापाठ नगर्ने भन्दै सार्वजनिक स्थलमा अपमान गरी जातीय विभेद गरेको पीडित महिलाको आरोप छ ।
नेपालको संविधानको धारा २४ मा छुवाछुत तथा जातीय विभेद विरुद्धको हक अन्तर्गत कुनै पनि व्यक्तिलाई निजको उत्पत्ति, जात, जाति, समुदाय, पेशा, व्यवसाय, वा शारीरिक अवस्थाको आधारमा कुनै पनि निजी तथा सार्वजनिक स्थानमा कुनै पनि प्रकारको छुवाछुत तथा भेदभाव गरिने छैन भनेर समेत व्यवस्था गरेको छ ।
यसैगरी मूलकी अपराध संहिता २०७४ को दफा ७ को उपदफा १ मा जातीय भेदभाव तथा छुवाछुत गरेमा तीन महिनादेखि तीन वर्षसम्म कैद वा १ हजार रुपियाँदेखि २५ हजार रुपियाँसम्म जरिवाना वा दुवै सजाय हुने व्यवस्था गरिएको छ ।
