बिर्तामोड / झापाको दमक नगरपालिकाले वडा नम्बर –४ का भूमिहीन दलित, सुकुम्बासीहरुलाई धनिपुर्जाको निस्सा वितरण गरिएको छ ।
स्थानीय दाहाल प्रतिष्ठानको सभाहलमा आइतबार एक कार्यक्रमको आयोजना गरी दमक नगर प्रमुख राम थापा र उपप्रमुख रेगिना भट्टराईले उनीहरूलाई जग्गा धनीपुर्जा वितरण गर्ने उद्देश्यले निस्सा वितरण गरेका हुन् ।
भूमिहीनहरूलाई निस्सा वितरण गर्दै नगर प्रमुख थापाले नगर भित्र सबै भूमिहीन दलित, सुकुम्बासीहरुलाई जग्गा धनीको प्रमाण पुर्जा वितरण गर्ने बताए । अब केहिदिनमै धनीपुर्जा समेत उपलब्ध गराइने उनको भनाई छ ।
भूमिहीनलाई जग्गाको मालिक बनाउन स्थानीय सरकारले उच्च प्राथमिकता दिएको बताउँदै उनले भने, ‘धनीपुर्जा उपलब्ध गराउने काममा अहिले निस्सा वितरण गरिएको र अब केहिदिनमै धनीपुर्जा समेत उपलब्ध गराइने छ ।’
त्यस्तै उप प्रमुख भट्टराईले भूमिहीनको समस्यालाई सधैँका लागि अन्त्य गरी समृद्ध नगर निर्माणमा आफूहरू लागि परेको बताइन् । प्राविधिक कामले केही ढिलाई भए पनि आगामी संघीय निर्वाचन अघिनै धनीपुर्जा उपलब्ध गराउने गरी आफूहरूले काम गरिरहेको उनको भनाई छ ।
कार्यक्रममा र राष्ट्रिय भूमि आयोग झापा जिल्ला अध्यक्ष तिलक सिंह पाण्डेले प्राप्त निवेदनका आधारमा आयोगले छानविन गरेर चाँडै धनीपुर्जा वितरण कार्यमा लाग्ने प्रतिबद्धता जनाएका थिए ।
वडा भित्र हालसम्म दर्ता रहेका ४५० भूमिहीन दलित, सुकुम्बासी तथा अव्यवस्थित बसोबासीहरुलाई धनिपुर्जाको निस्सा वितरण गरिएको छ । यसअघि भूमी आयोगको सहयोगमा नगरपालिकाले वडा नम्बर –१० का भूमिहीनहरूलाई पनि धनीपुर्जाको निस्सा वितरण गरेको थियो ।
