बिर्तामोड / सुनसरीको वराहक्षेत्र नगरपालिकामा विद्यार्थीलाई यौन दुर्व्यवहार गरेको आरोपमा शिक्षक पक्राउ परेका छन् । पक्राउ पर्नेमा सुनसरीको वराहक्षेत्र -९ स्थित श्री सरस्वती माविका शिक्षक डम्बर पइँकरा रहेका छन् । 

कक्षा ८ र ९ पढाउने शिक्षक डम्बर पइँकरालाई आफ्नै विद्यार्थीलाई यौन दुर्व्यवहार गरेको आरोपमा इलाका प्रहरी कार्यालय (महेन्द्रनगर) ले पक्राउ गरेको हो । आरोपित शिक्षकले कक्षामा अध्ययनरत छात्राको संवेदनशील अङ्गमा हात लगाउने र अस्वाभाविक कुराहरू गर्ने आरोप पीडित पक्षले लगाएको छ ।
पइँकराले निकै लामो समयदेखि छात्रालाई गलत व्यवहार गरिरहेको विषयमा शुक्रबार विद्यालयमा आवाज उठाइएको थियो । 
आइतबार बिहान विद्यालयमा आरोपित शिक्षक र पीडित विद्यार्थी राखेर माफी मगाउन खोजिएपछि आक्रोशित विद्यार्थी र अभिभावक विरोधमा उत्रिएका थिए । प्रहरीले भने शिक्षकलाई तत्कालै पक्राउ गरेको थियो । घटनाबारे छानबिन हुने इलाका प्रहरी कार्यालय (महेन्द्रनगर) का प्रहरी निरीक्षक राजेश दत्तले जानकारी दिए ।