बिर्तामोड / झापाको दमकमा ट्रकको ठक्करबाट स्कुटर चालकको मृत्यु भएको छ । मृत्यु हुनेमा दमक नगरपालिका- ४ निवासी ६८ वर्षीय राम जुलुम नायक रहेका छन् ।
गत साउन २७ गते बिहान पूर्व पश्चिम राजमार्ग अन्तरगत दमक ४ स्थित चिया दोकान नजिकै पश्चिमबाट पूर्वतर्फ जाँदै गरेको ना ८ ख ३३३३ नम्बरको ट्रकले दक्षिणबाट उत्तरतर्फ बाटो काट्दै गरेको प्रदेश नं १-०४-००१ प २४५५ नम्बरको स्कुटरलाई ठक्कर दिएको थियो ।
ठक्करबाट घाइते भएका स्कुटर चालक नायकलाई उपचारका लागी निम्स अस्पताल दमक लगिएकोमा त्यहाँ उपचार सम्भव नभएपछि थप उपचारको लागि विराट नर्सिङ होम विराटनगर पठाइएको थियो । उनको सोही अस्पतालमा उपचारको क्रममा आज बिहान मृत्यु भएको जिल्ला प्रहरी कार्यालय झापाका प्रहरी नायब उपरीक्षक बसन्त पाठकले बताए ।
ट्रक चालक अर्जुनधारा नगरपालिका -५ निवासी ३८ वर्षीय मातृका दनुवार र दुवै गाडीलाई इलाका प्रहरी कार्यालय दमकले नियन्त्रणमा लिएर घटनाबारे थप अनुसन्धान गरिरहेको छ ।
