झापा / नेपाल प्रहरीका महानिरीक्षक धिरजप्रताप सिंह र सशस्त्र प्रहरी महानिरीक्षक राजु अर्याल न्यूयोर्क जाने भएका छन् । तेस्रो संयुक्त राष्ट्रसंघीय प्रहरी प्रमुख शिखर सम्मेलन २०२२ मा भाग लिन सिंह र अर्याल भदौमा न्यूयोर्क जाने भएका हुन् ।
मन्त्रिपरिषद्को बिहीवार बसेको बैठकले भदौ १६ मा संयुक्त राष्ट्रसंघको मुख्यालय न्यूयोर्कमा सञ्चालन हुने तेस्रो यूएनकप्समा सहभागिताका लागि स्वीकृति दिने निर्णय गरेको छ । उक्त सम्मेलनमा यसअघि पनि नेपालबाट दुवै सुरक्षा निकायका प्रमुखहरूको सहभागिता रहेको थियो ।
सम्मेलनमा अन्तर्राष्ट्रिय शान्ति, सुरक्षा र सुदृढीकरणमा संलग्न विभिन्न देशका गृहमन्त्री, प्रहरी प्रमुख, क्षेत्रीय र व्यवसायिक प्रहरी सङ्गठनका प्रतिनिधिहरूको सहभागिता रहनेछ ।
यूएनकप्स २०२२ मा प्रहरी, वित्तीय योगदान कर्ता, संयुक्त राष्ट्र संघको सचिवालय तथा संयुक्त राष्ट्र प्रणालीबीच साझा धारणा निर्माण गर्ने विषयमा छलफल हुनेछ ।
संयुक्त राष्ट्र संघ प्रहरीले नागरिकहरूको सुरक्षा, राष्ट्रिय प्रहरी सेवाहरूको पुननिर्माण लगायत विविध र जटिल कार्यको प्राप्तिको आवश्यकताबारे समेत सम्मेलनमा चर्चा हुनेछ । त्यसका साथै अपराध र संघर्षलाई रोक्ने र शान्ति कायम कसरी गर्ने भन्नेबारे समेत सम्मेलनमा छलफल हुनेछ ।
