काठमाडौं / स्रोत नखुलेको रकम सहित प्रहरीले एकजनालाई पक्राउ गरेको छ । पक्राउ पर्नेमा काठमाडौं महानगरपालिका- ६ तिनचुली बगला मार्ग बस्ने गोरखा चुम नुब्री गाउँपालिका- १ घर भएका २४ वर्षीय धावा घ्याल्चेन रहेका छन् ।
उनलाई स्रोत नखुलेको नगद ४९ लाख ५० हजार ५० रुपैयाँ सहित बुधबार दिउँसो प्रहरीले पक्राउ गरेको हो । काठमाडौं महानगरपालिका- ६ भृकुटी चोकबाट बा ९९ प ७२०४ नम्बरको मोटरसाइकलमा सवार घ्याल्चेनलाई उक्त रकम ३२ लाख ५० रुपैयाँ सहित फेला पारी प्रहरी प्रभाग कपनबाट खटिएको प्रहरीले पक्राउ गरेको थियो ।
अनुसन्धानको क्रममा प्रहरीले उनको डेरा कोठाबाट थप १७ लाख ५० हजार रुपैयाँ फेला पारेको हो । यस सम्बन्धमा थप आवश्यक अनुसन्धान गरिरहेको प्रहरीले जनाएको छ ।
