झापा / हुम्लामा रेडियो कर्णाली आवाजका रिपोर्टर, प्रेस चौतारीका जिल्ला उपाध्यक्ष सिमकोट गाउँपालिका–४ बुराउसेका ४२ वर्षीय मिग्युर लामालाई कुटपिट गरेको आरोपमा एक जना पक्राउ परेका छन् । पक्राउ पर्नेमा सिमकोट गाउँपालिका–२ ठेहेका ३५ वर्षीय बाँचबहादुर भण्डारी रहेको प्रहरीले जनाएको छ ।
साउन १४ गते बेलुका ८ बजेको समयमा रेडियोका कर्मचारीका आफन्त खार्पुनाथ गाउँपालिका- ३ रायाका २२ वर्षीय ऐटन रावलले रेडियोको कोठामा गएर सामान ल्याउने क्रममा एफएम सञ्चालन गरिएको घरधनीका आफन्त भण्डारीले आफ्नो कोठा भित्र पसेर चोरको आरोप लगाई कुटपिट गर्दा रावललाई सामान्य चोट लागेको र सञ्चारकर्मी लामा घाइते भएको रेडियोका स्टेसन इन्चार्ज नवराज महताराले बताए ।
उनका अनुसार सञ्चारकर्मी भनिएका लामालाई पनि छलफलका लागि भन्दै प्रहरी कार्यालयमा लगिएको भए पनि एक्कासि बेहोस भएपछि साउन १४ गते नै उपचारका लागि जिल्ला अस्पतालमा भर्ना गरिएको छ ।
