बिर्तामोड / झापा र सुनसरीका दुई छुट्टाछुट्टै स्थानमा बुधवार भएको सवारी दुर्घटनामा परी २ जनाको मृत्यु भएको छ ।
बुधवार साँझ झापाको कमल गाउँपालिका – ५ पूर्व पश्चिम राजमार्गमा पश्चिमबाट पूर्व तर्फ जाँदै गरेको बागमती प्रदेश-०३- ००१ क २१२ नम्बरको ट्रिपरले साइकल यात्री तुम्बेवा गाउँपालिका- ५ पाँचथरका १६ वर्षीय संजिप ईम्सम लिम्बुलाई ठक्कर दिँदा लिम्बुको घटनास्थलमै मृत्यु भएको तथा घटना सम्बन्धमा थप अनुसन्धान भइरहेको इलाका प्रहरी कार्यालय दमकले जनाएको छ ।
यसैगरी सुनसरीको भोक्राहा नर्सिङ गाउँपालिका- ४ मा भारतीय नम्बर प्लेटको स्कारपियोले मोटरसाइकललाई ठक्कर दिँदा मोटरसाइकल चालकको मृत्यु भएको छ ।
बुधवार साँझ सुनसरीको इनरुवाबाट लौकही तर्फ जाँदै गरेको बि आर ११ पी बी ८०१२ नम्बरको स्कारपियोले विपरित दिशाबाट आँउदै ना ६३ प ४०७५ नम्बरको मोटरसाइकललाई टक्कर दिंदा घाईते भएका मोटरसाइकल चालक बर्दिबास नगरपालिका- ६ धनुषाका ३० वर्षीय बालकृष्ण राना मगरको उपचारको क्रममा न्युरो अस्पताल विराटनगरमा मृत्यु भएको तथा घटना सम्बन्धमा थप अनुसन्धान भइरहेको जिल्ला प्रहरी कार्यालय सुनसरीले जनाएको छ ।
