ताप्लेजुङ / ताप्लेजुङको मेरिङदेन गाउँपालिका –२ सान्थाक्रामा सोमबार बिहान आगलागी हुँदा एक घर र मतान जलेको छ । स्थानीय दाबा शेर्पाको घर र मतान जलेर ध्वस्त भएको हो ।
पासांकी शेर्पाका अनुसार बिहान करिब ३ बजेतिर आगलागी भएको थियो । घरमा सुतिरहेका तीन जना भाग्न सफल भएका थिए । पासांकीका अनुसार चाँडै थाहा पाएपछि उनीहरु भाग्न सकेका हुन् ।
आफ्नो हजुरबुबा, आमा र एक जना दाइ रहेको उनले बताइन् । आगलागीबाट घर र मतानभित्र रहेका खाद्यान्न, लत्ताकपडा, भाँडावर्तन लगायतका सामग्री जलेर नष्ट भएका छन् ।
विद्युत सट भएर आगलागी भएको हुन सक्ने स्थानीयको अनुमान छ । दोभान इलाका प्रहरी कार्यालयबाट जाने प्रहरी टोलीले क्षतिको विवरण संकलन गर्ने जिल्ला प्रहरी कार्यालयले जनाएको छ ।
