काठमाडौँ / काठमाडौँमा ट्रिपरभित्रै किशोरीलाई बलात्कार गरेको आरोपमा एक जना पक्राउ परेका छन् । ट्रिपरभित्र १७ वर्षीय किशोरीलाई बलात्कार गरेको आरोपमा दोलखा गौरीशङ्कर गाउँपालिका- ८ निवासी ३२ वर्षीय ज्ञानबहादुर नेपाली सोमबार पक्राउ परेका हुन् ।
काठमाडौँ जिल्ला प्रहरी परिसरका प्रहरी उपरीक्षक दिनेशराज मैनालीले पक्राउ नेपालीले यही असार २४ गते राति रोकी राखेको रा १ ख २७३४ नम्बरको ट्रिपरभित्र बलात्कार गरेको खुल्न आएको जानकारी दिए ।
दोलखाबाट काठमाडौँ आएको उक्त ट्रिपरले गौशालाबाट ती किशोरीलाई ट्रिपरमा हालेर थानकोट ल्याएका थिए ।
थानकोटस्थित प्रहरी वृत्तका प्रमुख डिल्लीनारायण पाण्डेको नेतृत्वमा खटिएको टोलीले पीडित महिलाको उद्धार गरी उपचारका लागि प्रसूति गृहमा पठाएको प्रहरी उपरीक्षक मैनालीले बताए ।
पक्राउ परेका नेपालीलाई मुलुकी फौजदारी संहिता २०७४ को करणी सम्बन्धी कसूर अन्तर्गत काठमाडौँ जिल्ला अदालतबाट पाँच दिनको म्याद थप गराइ अनुसन्धान गरिरहेको जनाइएको छ ।
