झापा / जाजरकोटमा १६ वर्षीया बालिकालाई बलात्कार गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा कुशे गाउँपालिका–५ दमदालाका २८ वर्षीय मायाराम नेपाली रहेका छन् ।
बालिका कोठामा एक्लै सुतेको अवस्थामा असार १३ गते दिउँसो कोठामा गई बलात्कार गरेको पीडित पक्षको आरोप छ ।
पीडित पक्षले असार १५ गते दिएको उजुरीको आधारमा प्रहरी चौकी पाँचकाटियाबाट खटिएको प्रहरी टोलीले खोजतलास गर्दै जाने क्रममा असार १६ गते गिरफ्तार गरिएको जिल्ला प्रहरी कार्यालयका डीएसपी सन्तोष निरौलाले बताए ।
प्रहरीले आरोपितसँग थप अनुसन्धान गर्न भन्दै जिल्ला अदालत जाजरकोटमा ०७९ असार १६ गते नै आरोपितलाई पेश गरी सात दिनको म्याद थप गरेको छ । पीडित पक्षले आरोपित विरुद्ध जबरजस्ती करणी सम्बन्धी मुद्दामा कारवाहीका लागि भन्दै उजुरी दिएका छन् ।
यस्तै रुपन्देहीमा १३ वर्षीया बालिकालाई यौन दुर्व्यवहार गरेको आरोपमा प्रहरीले ४१ वर्षीय आफन्तलाई पक्राउ गरेको छ ।पीडितलाई आरोपितले असार १ गते यौन दुर्व्यवहार गरेको भन्दै पीडितले आफन्तको सहयोगमा असार १५ गते इलाका प्रहरी कार्यालय सालझण्डीमा उजुरी परेको थियो । आरोपितले राती घरमा सुतिरहेको बेला मादक पदार्थ सेवन गरी यौन दुर्व्यवहार गरेको पीडितको आरोप रहेको छ । उजुरीका आधारमा आरोपितलाई पक्राउ गरी कारबाही अगाडि बढाइएको थप अनुसन्धान भइरहेको इलाका प्रहरी कार्यालय सालझण्डीका प्रहरी निरीक्षक जगनाथ मरासिनीले बताए ।
