बिर्तामोड / मोरङको विराटनगर महानगरपालिका -१५ स्थित १ नम्बर र २ नम्बर ढाटबाट लागूऔषध सहित ४ जना पक्राउ परेका छन् । बिहीबार दिउसो सवा १२ बजे लागूऔषध नियन्त्रण ब्युरो विराटनगरबाट खटिएको प्रहरी टोलीले २ नम्बर ढाट छेउबाट भारतबाट नेपाल तर्फ आँउदै गरेका मोरङ सुन्दरहरैचा नगरपालिका ४ का २६ वर्षीय पवन घिमिरे र सुन्दरहरैचा नगरपालिका ६ का २७ वर्षीय विजय राईलाई लुपिजेसिक १२ ऐम्पुल, फेनारगन १२ ऐम्पुल, डाईजोपाम १२ ऐम्पुल, ऐभिल १२ ऐम्पुल सहित पक्राउ गरेको हो ।
यसै गरी हिजै दिउसो २ बजे १ नम्बर ढाटबाट लागूऔषध नियन्त्रण ब्युरो विराटनगरबाट खटिएको प्रहरी टोलीले बा ३५ प २७१४ नम्बरको मोटरसाइकलमा भारतबाट नेपाल तर्फ आँउदै गरेको सुन्दरहरैचा नगरपालिका -१२ का २० वर्षीय अभिषेक चौधरी र पछाडि सवार सुन्दरहरैचा नगरपालिका -१२ कै १९ वर्षीय निशान गुरुङलाई इन्ट्रा भेट ३० ट्याबलेट सहित पक्राउ गरेको छ । पक्राउ परेका चारै जनाको इलाका प्रहरी कार्यालय रानीबाट थप अनुसन्धान भईरहेको प्रहरीले जनाएको छ ।
