धादिङ / काठमाडौँबाट रौतहटतर्फ आउँदै गरेको यात्रुबाहक रात्री बस गएराति दुर्घटना हुँदा ३० जना घाइते भएका छन् ।
पृथ्वीराजमार्गमा पर्ने गल्छी गाउँपालिका – ६ स्थित चिरौँदीमा प्रदेश ३–०१–००५ ख –९७२९ नम्बरको यात्रु खचाखच भएको बस सडकमा पल्टेर दुर्घटना भएको हो ।
इलाका प्रहरी कार्यालय गजुरीका प्रहरी नायब उपरीक्षक भावेश रिमालका अनुसार सडक बिग्रेको र घुम्ती सडकमा राती गाडी दुर्घटना भएको हो ।
दुर्घटनामा ३० जना यात्रु घाइते भएका छन् । घाइतेहरूको स्थानीय स्वास्थ्यचौकीमा उपचार भइरहेको छ ।
७ जना गम्भीर घाइते भएकाहरूलाई थप उपचारका लागि काठमाडौँस्थित ट्रमा सेन्टरमा पठाइएको प्रहरीले जानकारी दिएको छ ।
