भोजपुर / भोजपुरका ५ स्थानीय तहको यातायात सेवा अवरुद्ध भएको छ । गत सोमबार देखि लगातार परेको वर्षाका कारण सडक हिलाम्य बन्दा आवतजावत बन्द भएको हो ।
यातायात बन्द हुँदा स्थानीयलाई आवतजावतसँगै दैनिक उपभोग्य वस्तु ढुवानी गर्न समस्या भएको छ ।
दक्षिणी क्षेत्रमा पर्ने रामप्रसाद राई, हुतवागढी र आमचोक गाउँपालिका तथा उत्तरी क्षेत्रका षडानन्द नगरपालिका र साल्पासिछिलो गाउँपालिकाको यातायात सेवा बन्द छ ।
सडक हिलाम्य भएपछि कृषकले उत्पादन गरेका कृषिउपजसँगै दूध सङ्कलनमा समस्या भएको छ । सडक ठप्प भएपछि दुग्धजन्य पदार्थ सङ्कलनमा समस्या भएको गणेशस्थान दुग्ध उद्योगका सञ्चालक रमेश कार्कीले बताए ।
सुत्केरी र बिरामीलाई अस्पताल लान र दैनिक उपभोग्य वस्तु ढुवानी गर्न कठिनाइ भएको टेम्केमैयुङ गाउँपालिका –५ मझौलेका सन्तोष विष्टले बताए । सदरमुकामबाट खोटाङको पाँचधारे बजारसम्म सञ्चालन हुने सडक पनि बन्द छ ।
भोजपुर–लेगुवा (६६ किलोमिटर) सडक र भोजपुर–चखेवा (४२ किलोमिटर) सडक भने सञ्चालनमा छ ।
