बिर्तामोड / मोरङमा भएको सवारी दुर्घटनामा परि दुई जनाको मृत्यु भएको छ । मृत्यु हुनेमा बूढीगंगा ४ का ६९ वर्षीय मंगल राम रहेको जिल्ला प्रहरी कार्यालय मोरङका डीएसपी दीपक श्रेष्ठले जानकारी दिए ।
को १ च ४४१४ नम्बरको खाली एम्बुलेन्सले साइकललाई ठक्कर दिँदा घाइते भएका साइकलमा सवार रामको उपचारका क्रममा शिक्षण अस्पतालमा मृत्यु भएको हो । एम्बुलेन्स चालक फरार रहेको र खोजी कार्य भइरहेको प्रहरीले जनाएको छ ।
यस्तै मोटरसाइकलको ठक्करबाट बुढीगंगा ५ का २६ वर्षीय राम श्रेष्ठको मृत्यु भएको छ । प्रदेश १–०२–०४१ प १४१४ नम्बरको मोटरसाइकलले बूढीगंगा ४ स्थित प्रिमियर वायर उद्योग अगाडि श्रेष्ठलाई ठक्कर दिएको थियो ।
दुर्घटनामा परेर गम्भीर घाइते भएका श्रेष्ठको विराट नर्सिङ होममा आज बिहान मृत्यु भएको हो । मोटरसाइकल चालकसहित मोटरसाइकलमा सवार अर्का एक जना घाइते भएका छन् । उनीहरूको विराट शिक्षण अस्पतालमा उपचार भइरहेको प्रहरीले जनाएको छ ।
