बिर्तामोड / झापाको गौरादह नगरपालिका –३ र झापा गाउँपालिका –३ को वडा अध्यक्षमा स्वतन्त्र उम्मेदवार विजयी भएका छन् ।
गौरादह –३ को वडा अध्यक्षमा दिलीपकुमार भण्डारी र झापा –३ को वडा अध्यक्षमा स्वतन्त्र उम्मेदवार सुवासलाल गणेश निर्वाचित भएका हुन् ।
जेब्रा चिन्हबाट चुनाव लडेका भण्डारीले गौरादह ३ मा झन्डै दोब्बर मत ल्याएर वडा अध्यक्षमा निर्वाचित भएका छन् ।
भण्डारीले एक हजार ९४ मत ल्याउँदा उनका निकटतम् प्रतिद्वन्द्वी नेकपा एमालेका गजेन्द्रप्रसाद घिमिरेले ५८६ मत ल्याएका छन् ।
तर, वडा अध्यक्ष स्वतन्त्र उम्मेदवारले जितेपनि सदस्यहरूमा भने एमालेले जितेको छ । सदस्यमा एमालेका हेमनाथ थापा, कृष्णप्रसाद सुवेदी, कल्पना अधिकारी र विमला विश्वकर्मा निर्वाचित भएका छन् ।
त्यस्तै झापा गाउँपालिका –३ मा भूइँकटहर चुनाव चिन्ह पाएका स्वतन्त्र उम्मेदवार गणेशले ९५८ मत ल्याएर वडा अध्यक्षमा निर्वाचित भएका हुन् । उनका प्रतिद्वन्द्वी नेकपा एमालेका खड्गनारायण राजवंशीले ६६३ मत ल्याएका छन् ।
वडा अध्यक्षमा स्वतन्त्र उम्मेदवारले जितेपनि बाँकी सदस्यहरू एमालेले जितेको छ । खुल्ला सदस्यमा एमालेका कुमार राई, अब्दुल रसिद, तारा सुवेदी बराल र सुमित्रा विश्वकर्मा विजयी भएका छन् ।