झापा / नेकपा (माओवादी केन्द्र) प्रदेश नम्बर १ कमिटीले प्रदेशका विभिन्न जिल्लामा बागी उम्मेदवारी दिने १४ जनालाई कारबाही गरेको छ।
वैशाख ३० गते हुने स्थानीय तह निर्वाचनका लागि पार्टीको निर्देशन र नीति विपरित गएर बागी उम्मेदवारी दिएको भन्दै १ नम्बर प्रदेश कमिटीले उनीहरूलाई कारबाही गरेको हो ।
ती मध्ये केही तीन जनालाई कारबाहीका केन्द्रमा सिफारिस गरिएको छ भने बाँकीलाई प्रदेश समितिले नै निलम्बन गरेको छ। कारबाहीमा पर्नेहरुमा प्रदेश सदस्य भीमबहादुर अधिकारी, केपी बराल र यदु ढकाल छन् ।
त्यस्तै साबित्रा थापा, होमबहादुर राई, कमलध्वज राई, तिलक राई, भीमबहादुर राई, दुर्गा बुर्जा मगर, रामप्रसाद बराल र सन्तोष सुवेदीलाई प्रदेश समितिले नै निलम्बन गरेको छ ।
पटक पटक सचेत गराउँदा पनि पार्टीको निर्देशन नमानेकाले पार्टी विधान अनुरूपको कसुर ठहर गरी उनीहरूलाई निलम्बन गरिएको पार्टी अध्यक्ष हर्कबहादुर नेम्वाङले जानकारी दिए ।
