काठमाडौं । काठमाडौंको शंखमुलस्थित भ्याली ब्वाइज होस्टलभित्रै भएको कुटपिट र धारिलो हतियार प्रहारको घटनाले एक युवकको ज्यान गएको छ । होस्टलमै बस्दै आएका युवाबीच भएको विवाद हिंसामा परिणत हुँदा २२ वर्षीय बसन्त कालाथोकीको मृत्यु भएको हो ।
दाङको घोराही उपमहानगरपालिका–१७ घर भएका कालाथोकीमाथि सोही होस्टलमा बस्ने बारा कलैया उपमहानगरपालिका–३ का १८ वर्षीय शेखर यादव र अन्दाजी २० वर्षीय प्रमित पटेलले कुटपिट तथा धारिलो हतियार प्रहार गरेको प्रहरीले जनाएको छ ।
घटनामा गम्भीर घाइते भएका कालाथोकीलाई तत्काल उपचारका लागि मिनभवनस्थित निजामती कर्मचारी अस्पताल लगिएको थियो । उनको टाउको र घाँटीमा गम्भीर चोट लागेको थियो । उपचारकै क्रममा चिकित्सकले उनलाई मृत घोषणा गरेका हुन् ।
घटनापछि प्रहरीले १८ वर्षीय शेखर यादवलाई नियन्त्रणमा लिएको छ । अर्का आरोपी प्रमित पटेल भने फरार रहेको प्रहरीले जनाएको छ । उनको खोजी भइरहेको छ ।
होस्टलजस्तो सुरक्षित मानिने ठाउँमै युवकको हत्या भएपछि घटनाले गम्भीर प्रश्नसमेत उठाएको छ । सामान्य विवाद कसरी कुटपिट हुँदै धारिलो हतियार प्रहार र अन्ततः ज्यान जाने अवस्थासम्म पुग्यो रु भन्ने विषयमा प्रहरीले अनुसन्धान अघि बढाएको छ ।
अहिले प्रहरीको अनुसन्धानको केन्द्रमा घटनाको वास्तविक कारण, घटनामा संलग्न व्यक्तिहरूको भूमिका र फरार आरोपीको खोजी रहेको छ । एक युवकको ज्यान गएको छ, एक जना पक्राउ परेका छन् र अर्का आरोपी फरार छन् ।
होस्टलभित्रै भएको यो घटनाले युवाबीच बढ्दो हिंसात्मक प्रवृत्ति र सार्वजनिक आवासस्थलको सुरक्षा व्यवस्थामाथि पनि प्रश्न उठाएको छ । घटनाको विस्तृत कारण भने प्रहरी अनुसन्धानपछि मात्रै खुल्नेछ ।
