काठमाडौं / काठमाडौंको न्युरोडस्थित निलम गहना पसलका सञ्चालक सागर शाक्यले आफ्नै साझेदार भारतीय व्यापारी नरेश बर्माको करिब साढे १२ करोड रुपैयाँ ठगी गरेको सार्वजनिक भएको छ ।
यो प्रकरण प्रहरीसम्म पुगेको लामो समय भइसक्दा पनि विवाद अझै मिल्न सकेको छैन । सुनचाँदी व्यापार संघका अध्यक्ष मणिरत्न शाक्य र सुरेश शाक्य प्रहरीसँग मिलेर सेटिङ्मा विवाद मिलाउन खोजेको र पीडित नरेशको पक्ष नलिइ शाक्यको पक्ष लिएको आरोप छ ।
आइतबार दुबै पक्षबीच वार्ता चलेको थियो तर, पसल सञ्चालक सागरले २ करोड मात्रै तिर्न तयार रहेको बताएपछि वार्ता भाँडिएको थियो । पीडित भनिएका बर्मा आफूले ब्याज बाहेक ९ करोड पाउनुपर्ने दाबी गरेका छन् ।
प्रहरीले गहनाका सञ्चालक शाक्य र भारतीय व्यापारी नरेश बर्माबीचको कारोबार लिखित नभएको भन्दै उनले मौखिक विवादमा टुंग्याउने कोसिस गरेका थिए । विवादलाई लिएर केही सञ्चार माध्यमसँग अध्यक्ष मणिरत्नले आफू मध्यस्तकर्ताको भूमिकामा रहेको बताएका छन् । तर, उनले मध्यस्तकर्ता भन्दा पनि विचौलियाको भूमिकामा रहेको आरोप पीडित पक्षको छ ।
