काठमाडौं । धनुषाको ढल्केबरमा प्रस्तावित क्रिटिकल केयर तथा ट्रमा सेन्टर निर्माणलाई लिएर देखिएको अन्योलबीच स्वास्थ्य तथा खाद्य स्वच्छतामन्त्री निशा मेहताले निर्माण प्रक्रिया नरोकिने स्पष्ट पारेकी छन् । उनले ढल्केबरको दीर्घकालीन योजना यथावत् राख्दै तत्काल दुर्घटनाका घाइतेलाई उपचार सेवा उपलब्ध गराउन लहानमा ट्रमा युनिट सञ्चालन गर्ने सरकारको योजना रहेको बताएकी हुन् ।
प्रतिनिधिसभाको सोमबारको बैठकमा सांसदहरूले उठाएका प्रश्नको जवाफ दिँदै मन्त्री मेहताले ढल्केबरको ट्रमा सेन्टर र लहानको ट्रमा युनिटलाई एकअर्काको विकल्पका रूपमा नहेर्न आग्रह गरिन् । नयाँ संरचना निर्माण सम्पन्न हुन समय लाग्ने भएकाले त्यस अवधिसम्म नागरिकलाई उपचारबाट वञ्चित हुन नदिन लहानमा तत्काल सेवा सुरु गर्न लागिएको उनको भनाइ छ ।
मन्त्रीका अनुसार लहानस्थित प्रादेशिक अस्पतालमा ट्रमा सेवा सञ्चालनका लागि आवश्यक आधारभूत पूर्वाधार उपलब्ध छन् । अस्पतालमा सीटी स्क्यान, आवश्यक चिकित्सकीय जनशक्ति, बिरामीको पर्याप्त चाप तथा ब्लड बैंकलगायतका सुविधा रहेकाले तत्काल ट्रमा युनिट सञ्चालन गर्न सकिने निष्कर्षमा सरकार पुगेको उनले बताइन् ।
ढल्केबरमा पूर्वाधार निर्माण, लहानमा तत्काल उपचार—सरकारले दुई तहमा योजना अघि बढाएको छ । मन्त्री मेहताले नयाँ ट्रमा सेन्टर निर्माणलाई दीर्घकालीन पूर्वाधारका रूपमा अघि बढाउने र लहानको युनिटलाई तत्काल उपचारको माध्यम बनाउने स्पष्ट पारेकी छन् ।उनका अनुसार सडक दुर्घटनामा गम्भीर घाइते भएका नागरिकलाई उपचारका लागि काठमाडौं ल्याउनुपर्ने अवस्थाले उपचारमा ढिलाइ हुने गरेको छ । त्यसलाई अन्त्य गर्न दुर्घटना बढी हुने तथा उपचारको आवश्यकता रहेका क्षेत्रमा ट्रमा सेवा विस्तार गर्ने सरकारको नीति रहेको उनले बताइन् ।
‘लहानमा ट्रमा युनिट सञ्चालन गर्नु ढल्केबरको विकल्प होइन,’ मन्त्री मेहताले भनिन्, ‘नयाँ संरचना निर्माण सम्पन्न नहुँदासम्म नागरिकलाई तत्काल उपचार उपलब्ध गराउने अन्तरिम र व्यावहारिक व्यवस्था हो।’मन्त्रीले एउटा स्थानमा दीर्घकालीन स्वास्थ्य पूर्वाधार निर्माण भइरहँदा अर्को स्थानमा तत्काल सेवा विस्तार गर्नु विरोधाभास नभएको पनि स्पष्ट पारिन् । बरु उपलब्ध अस्पताल र जनशक्तिको तत्काल उपयोग गर्दै नयाँ संरचना निर्माणलाई सँगसँगै अघि बढाउनु सरकारको प्राथमिकता रहेको उनको भनाइ छ ।
ढल्केबरमा निर्माण भइरहेको ट्रमा सेन्टरलाई अगाडि बढाउन तथा लहानमा उपलब्ध पूर्वाधारबाट तत्काल उपचार सेवा सञ्चालन गर्ने वातावरण बनाउन मन्त्रीले जनप्रतिनिधि र सम्बन्धित सरोकारवालालाई सहयोग गर्न आग्रह गरेकी छन् ।सरकारको यो योजनाले ‘काठमाडौंमै पुग्नुपर्ने बाध्यता’ घटाउने उद्देश्यसहित पूर्वाधार निर्माण र तत्काल उपचार सेवाबीचको खाडल पुर्ने प्रयास गरेको देखिन्छ । अब ढल्केबरको निर्माण प्रक्रिया कति छिटो अघि बढ्छ र लहानको ट्रमा युनिटले कहिलेदेखि पूर्ण सेवा दिन थाल्छ भन्ने विषय महत्त्वपूर्ण हुनेछ ।
