सर्लाही / सर्लाहीमा आइतबार यात्रुबाहक बस दुर्घटना हुदाँ ४ जनाको मृत्यु भएको छ भने , बसमा सवार २५ जना भन्दा बढि यात्रु घाइते भएका छन् । सर्लाहीको पूर्व-पश्चिम राजमार्ग अन्तर्गत फुलजोरमा बस दुर्घटना हुदाँ चार जनाको मृत्यु भएको हो । दुर्घटनामा परि मृत्यु हुनेहरूको पहिचान भने खुलेको छैन ।
वीरगन्जबाट जनकपुरतिर जाँदै गरेको ना ४ ख ८५५५ नम्बरको यात्रुवाहक बस फुलजोरस्थित फुलजोर खोलामा पसेको जिल्ला ट्राफिक प्रहरी कार्यालयका प्रमुख केदारमान दोङले बताएका छन् ।इलाका प्रहरी कार्यालय लालबन्दीले दिएको जानकारी अनुसार मृतकहरूको शव पोस्टमार्टमका लागि जिल्ला अस्पताल लगिएको र दुर्घटनामा घाइते भएकाहरूको लालबन्दीस्थित स्वास्थ्य संस्थामा उपचार भइरहेको छ । दुर्घटनाबारे अनुसन्धान र विवरण सङ्कलनको काम भइरहेको प्रहरीले जनाएको छ ।
